Illugi-Gunnarsson-1

Illugi Gunnarsson fæddist á Siglufirði hinn 26. ágúst árið 1967. Hann er sonur þeirra Ínu Illugadóttur og Gunnars Rafns Sigurbjörnssonar. Síðar flutti fjölskyldan til Hafnarfjarðar, en bræður Illuga eru Eysteinn Orri, guðfræðinemi og Styrmir, lögfræðingur. Systir Illuga er Guðrún Sóley, nemi í stjórnmálafræði og lögfræði.

Menntun
Illugi útskrifaðist með B.Sc. gráðu í hagfræði frá Háskóla Íslands árið 1995, en síðar lauk hann MBA-prófi frá London Business School árið 2000. Nám Illuga var þó ekki einskorðað við bóknámið, því hann hefur lagt stund á tónlist frá barnæsku. Hann lærði við Tónlistarskóla Siglufjarðar, Hafnafjarðar og Reykjavíkur, en síðar fór hann í þriggja mánaða nám í organleik í Páfagarði árið 1997.

Störf
Á meðan grunnskólagöngunni stóð vann Illugi hefðbundin sumarstörf, sem til féllu á Siglufirði. Eftir að í Menntaskólann var komið og síðar í háskóla vann Illugi hins vegar á sumrin í frystihúsi Hjálms á Flateyri. Illugi tók miklu ástfóstri við Flateyri, ílengdist þar síðar og var leiðbeinandi í Grunnskóla Önundarfjarðar veturinn 1987 til 1988. Hann gerðist skrifstofumaður hjá Vestfirskum skelfiski árin 1995 til 1997, en veturinn 1997-1998 lagði hann stund á hagfræðilegar rannsóknir á brottkasti afla við Háskóla Íslands. Heimkominn úr námi frá Lundúnunum árið 2000 réði Davíð Oddsson forsætisráðherra Illuga sem pólitískan aðstoðarmann sinn í forsætisráðuneytinu, en þaðan fylgdi Illugi honum yfir í utanríkisráðuneytið árið 2004. Hann lét af störfum þar um leið og Davíð haustið 2005 og vann sem sjálfstætt starfandi hagfræðingur. Árið 2007 var Illugi kjörinn á Alþingi og hefur þar setið í efnahags- og skattanefnd, fjárlaganefnd, menntamálanefnd, umhverfisnefnd og Íslandsdeild þingmannanefndar EFTA, auk þess sem hann er formaður þingflokks sjálfstæðismanna.

Félagsstörf ýmis hafa verið Illuga hugleikin frá unglingsárum og í menntaskóla varð hann sigursæll keppandi og leiðbeinandi í ræðumennsku. Á námsárum sínum í Háskóla Íslands sat hann í stjórn Vöku, félagi lýðræðissinnaðra stúdenta árin 1989-1990, var oddviti Vöku í stúdentaráði 1992-1993 og fulltrúi stúdenta í háskólaráði 1992-1994. Þá var Illugi kjörinn formaður Heimdalls, félags ungra sjálfstæðismanna í Reykjavík 1997-1998. Illugi hefur skrifað ótal greinar og ritgerðir á umliðnum árum, en í félagi við Orra Hauksson, verkfræðing, skrifaði hann bókina Fiskimiðin og þjóðarheill, sem út kom árið 1997 og var endurútgefin ári síðar. Þá lét Illugi verða af gömlum draumi árið 2004, þegar hann gaf út plötu með píanóleik sínum.

Fjölskylda
Eiginkona Illuga er Brynhildur Einarsdóttir, sagnfræðingur og kennari við Menntaskólann við Sund, dóttir þeirra Sigrúnar Gerðu Gísladóttur, hjúkrunarfræðings, og Einars Odds Kristjánssonar fyrrverandi alþingismanns. Þau Brynhildur og Illugi búa við Ljósaland í Fossvoginum. Illugi og Brynhildur eiga dóttur, Guðrúnu Ínu Illugadóttur.